مسجد غمامہ ایک تعارف

          مسجد غمامہ ایک تعارف

        مسجد نبوی مدینہ منورہ کے گیٹ نمبر چھ سے باہر مغربی سمت شارع السلام کی طرف نکلتے وقت ایک چھوٹا سا میدان ہے، جس کے بائیں طرف ایک چھوٹی سی مسجد ہے جس کا نام مسجد غمامہ ہے، اسی کے سامنے یعنی داہنی جانب ایک بالکل چھوٹی سی مسجد ہے جس کو مسجد ابوبکر صدیق رضی اللہ عنہ کہا جاتا ہے، یہ ہمیشہ بند رہتی ہے-
        مسجد غمامہ کے متعلق یہ مشہور ہے کہ یہاں پر آپ صلی اللہ علیہ وسلم نے استسقاء کی نماز ادا کی اور دعا ختم کرنے سے پہلے ہی بادل کا ایک ٹکڑا مدینہ پر سایہ فگن ہوا اور موسلا دھار بارش ہوئی، پھر اسی جگہ پر ترکی حکومت نے ایک مسجد تعمیر کی جس کا نام مسجد الغمامۃ رکھا، چونکہ عربی میں غمامہ بادل کے ٹکرے کو کہتے ہیں، اسی مناسبت سے اس کا نام  غمامہ رکھا گیا ہے، یہ مسجد ہر فرض نماز کے لیے کھولی جاتی ہے، لیکن اس مسجد میں نماز ادا کرنے کی کوئی خاص فضیلت نہیں ہے، یہ بھی عام مسجد کی طرح ہے، مگر افسوس کہ لوگ صرف یہ سمجھ کر یہاں خوب نمازیں ادا کرتے ہیں، سنن ونوافل اور فرائض کا خوب اہتمام کرتے ہیں، اور بالخصوص یہاں پر عورتوں کا ہجوم لگا رہتا ہے، کہ یہاں پر اللہ کے نبی صلی اللہ علیہ وسلم نے نماز ادا کی ہے، لیکن یہ اچھی طرح یاد رہے کہ یہ حصہ (مسجد غمامہ) مسجد نبوی سے باہر ہے-
       لہذا ہم سب کی ذمہ داری بنتی ہے کہ ہم اس مسجد میں نماز پڑھنے کو ترجیح دیں جہاں پر نماز پڑھنے کی فضیلت ہو، جیسے مسجد نبوی میں ایک نماز پڑھنا ایک ہزار نماز سے بہتر وافضل ہے، اب جو مسجد نبوی کو چھوڑ کر قریب کی دیگر مساجد میں نماز پڑھے تو اس کی نماز تو بالکل درست ہوگی لیکن مسجد نبوی کی نماز کی فضیلت حاصل نہیں ہوگی گرچہ وہ مسجد نبوی کے بالکل بازو ہی میں کیوں نہ ہو، دعاہےرب العالمین سے کہ مولائے کریم ہم سب مسلمانوں کو کتاب وسنت کی واضح تعلیمات پر عمل پیرا ہونے کی توفیق عطا فرمائے آمین-